2026-cı ilin 5 may tarixində Mingəçevir Dövlət Universitetində rektor Anar Eminovun iştirakı ilə tələbələr, magistrantlar və onların valideynləri, həmçinin vətəndaşlar üçün növbəti vətəndaş qəbulu təşkil olunub.

Qəbul zamanı universitet rəhbərliyi ilə təhsil alanlar və valideynlər arasında açıq və konstruktiv dialoq mühiti yaradılıb. Səsləndirilən müraciətlər diqqətlə dinlənilib, qaldırılan məsələlərə operativ yanaşma sərgilənərək müvafiq istiqamətlər üzrə tapşırıqlar verilib. Görüş çərçivəsində tələbələrin akademik inkişafı, praktiki bacarıqlarının artırılması və inklüziv, əlçatan təhsil mühitinin formalaşdırılması kimi məsələlər ətrafında geniş fikir mübadiləsi aparılıb.

Müraciətlər əsasən istehsalat təcrübəsinin daha səmərəli təşkili, akademik yöndə dəstək, tədris prosesində innovativ yanaşmaların tətbiqi, müəllim-tələbə münasibətlərinin daha da inkişaf etdirilməsi və beynəlxalq təhsil imkanlarının genişləndirilməsi ilə bağlı olub.

Görüşdə səsləndirilən fikir və təkliflər dayanıqlı inkişaf məqsədlərinə uyğun olaraq keyfiyyətli təhsilin təmin olunması, bərabər imkanların yaradılması və universitetin cəmiyyətlə əlaqələrinin gücləndirilməsi baxımından xüsusi əhəmiyyət kəsb edib.

Qeyd edək ki, bu cür vətəndaş qəbulları universitetdə şəffaf idarəetmə, inklüziv qərarvermə və tələbəyönümlü yanaşmanın gücləndirilməsinə xidmət etməklə yanaşı, dayanıqlı və innovativ təhsil mühitinin formalaşdırılmasına töhfə verir. Bu istiqamətdə görüşlərin davamlı keçirilməsi nəzərdə tutulur.