Mingəçevir Dövlət Universitetinin İqtisadiyyat kafedrasının təşkilatçılığı ilə Azərbaycan Texniki Universitetinin “Rəqəmsal iqtisadiyyat və maliyyə texnologiyaları” kafedrasının dosenti Günay Əliyeva tərəfindən “İnklüziv İnkişaf və Sosial Bərabərsizlik: SDG çərçivəsində yoxsulluğun azaldılması mexanizmləri” mövzusunda seminar keçirilib.

Seminarın əsas məqsədi tələbələrin inklüziv iqtisadi inkişaf, sosial siyasət, yoxsulluğun azaldılması mexanizmləri və dayanıqlı inkişaf yanaşmaları üzrə nəzəri və praktiki biliklərinin gücləndirilməsi, eləcə də analitik düşüncə və tədqiqat yönümlü bacarıqlarının inkişaf etdirilməsi olub.

Tədbir çərçivəsində Dayanıqlı İnkişaf Məqsədləri (SDG) kontekstində inklüziv inkişaf siyasətinin əsas istiqamətləri, sosial bərabərsizliyin iqtisadi və sosial təsirləri, yoxsulluğun azaldılması üzrə beynəlxalq yanaşmalar və dövlət siyasətlərinin rolu geniş şəkildə təhlil edilib. Eyni zamanda, sosial rifahın yüksəldilməsi, insan kapitalının inkişafı, maliyyə inklüzivliyi və dayanıqlı iqtisadi artım arasında qarşılıqlı əlaqələr barədə ətraflı müzakirələr aparılıb.

Günay Əliyeva çıxışı zamanı müxtəlif ölkələrin sosial müdafiə modellərinə və qlobal təcrübələrə əsaslanan nümunələr təqdim edib, sosial bərabərsizliyin azaldılmasında innovativ iqtisadi mexanizmlərin tətbiqi imkanlarını iştirakçılarla bölüşüb. Həmçinin rəqəmsal texnologiyaların və müasir maliyyə alətlərinin sosial inklüzivliyin gücləndirilməsinə təsiri ilə bağlı praktik yanaşmalar diqqətə çatdırılıb.

İnteraktiv formatda keçirilən seminarda universitetin tələbə və müəllim heyəti iştirak edib. Tədbir çərçivəsində tələbələrin sualları cavablandırılıb, mövzu ətrafında geniş fikir mübadiləsi aparılıb və aktual sosial-iqtisadi çağırışlara dair elmi yanaşmalar müzakirə olunub.

İştirakçılar seminarı sosial-iqtisadi proseslərə baxışın genişləndirilməsi, dayanıqlı inkişaf istiqamətində biliklərin artırılması və qlobal çağırışların daha dərindən anlaşılması baxımından faydalı akademik platforma kimi qiymətləndiriblər.

Qeyd edək ki, Mingəçevir Dövlət Universitetində sosial-iqtisadi tədqiqat yönümlü biliklərin inkişafı, inklüziv və dayanıqlı inkişaf yanaşmalarının tədris prosesinə inteqrasiyası, elmi əməkdaşlığın genişləndirilməsi və tələbəyönümlü akademik təşəbbüslərin təşviqi istiqamətində ardıcıl fəaliyyət davam etdirilir.