2026-cı ilin 15 may tarixində Mingəçevir Dövlət Universitetinin Fizika və ekologiya kafedrasının təşkilatçılığı ilə “Sıfır Karbon Ekofest” (Zero Carbon EcoFest) tədbiri keçirilib. Tədbir çərçivəsində yaşıl kampus modelinin tətbiqi, resurslardan səmərəli istifadə, enerji effektivliyi və tullantıların idarə olunması kimi prioritet istiqamətlər üzrə müasir yanaşmalar sistemli şəkildə müzakirə olundu və universitetin uzunmüddətli ekoloji strategiyası ilə uzlaşdırıldı.
Tədbiri giriş nitqi ilə açan Fizika və ekologiya kafedrasının müdiri Təranə Yusibova çıxışında qeyd edib ki, müasir ali təhsil müəssisələrinin qarşısında duran əsas çağırışlardan biri yalnız akademik biliklərin ötürülməsi deyil, eyni zamanda ekoloji məsuliyyətli düşüncə tərzinin formalaşdırılması və dayanıqlı inkişaf prinsiplərinin institusional səviyyədə tətbiqidir, bu baxımdan “Zero Carbon EcoFest” kimi təşəbbüslər universitetdə yaşıl idarəetmə modelinin gücləndirilməsinə, karbon emissiyalarının sistemli şəkildə azaldılmasına və resurslardan səmərəli istifadə mədəniyyətinin formalaşdırılmasına xidmət edir. O, vurğulayıb ki, ekoloji transformasiya artıq seçim deyil, zərurətdir və bu prosesdə universitetlərin rolu yalnız tədqiqat və tədrislə məhdudlaşmır, eyni zamanda innovativ yanaşmaların tətbiqi və real sektorla əməkdaşlıq vasitəsilə konkret nəticələrin əldə olunmasını tələb edir, bu istiqamətdə Mingəçevir Dövlət Universitetində həyata keçirilən təşəbbüslər isə dayanıqlı kampus modelinin formalaşdırılması və beynəlxalq ekoloji standartlara uyğunlaşma baxımından mühüm əhəmiyyət kəsb edir.
Festivalın panel müzakirələrində Mingəçevir Bələdiyyəsinin nümayəndəsi Anar Quliyev, 8 saylı RETSİ-nin aparıcı məsləhətçisi Fuad Bağırov, “Azərbaycan İES” MMC-nin Texniki istehsalat şöbəsinin rəis müavini Şahin Nağıyev və Mingəçevir Şəhər Su Kanal İdarəsinin istismar sahəsi üzrə mütəxəssisi Elnur Ələkbərov – enerji keçidi, sənaye və ekologiya arasında balansın qorunması, su resurslarının dayanıqlı idarə olunması və şəhər mühitində ekoloji davamlılığın artırılması kimi mövzular ətrafında ardıcıl və analitik çıxışlarla çıxış etdilər.
“Zero Carbon EcoFest” çərçivəsində təqdim olunan təşəbbüslər və ideyalar universitet daxilində ekoloji idarəetmə mexanizmlərinin təkmilləşdirilməsinə, karbon izinin monitorinqi və optimallaşdırılması üzrə praktiki alətlərin tətbiqinə, eləcə də tələbə və əməkdaşların yaşıl transformasiya proseslərinə daha fəal inteqrasiyasına real töhfə verdi. Tədbir nəticəsində formalaşan yanaşmalar ali təhsil müəssisəsində dayanıqlı inkişaf indikatorlarının gücləndirilməsi, ekoloji performansın ölçüləbilən nəticələrlə qiymətləndirilməsi və beynəlxalq səviyyədə rəqabətqabiliyyətli yaşıl universitet modelinin inkişafı baxımından strateji əhəmiyyət daşıyır.
Qeyd edək ki, keçirilmiş festival bir daha göstərdi ki, sistemli ekoloji təşəbbüslər, akademik bilik və praktik sektor təcrübəsinin inteqrasiyası sayəsində universitetlər yalnız təhsil məkanı deyil, həm də dayanıqlı inkişafın aparıcı platformalarından birinə çevrilə bilər.