Mingəçevir Dövlət Universitetində tələbələr və gənc innovatorlar üçün “Green Tech Challenge” startap müsabiqəsi təşkil olunub. Müsabiqə ətraf mühitin qorunması, iqlim dəyişikliklərinin təsirlərinin azaldılması və təbii resurslardan səmərəli istifadə istiqamətində innovativ ideyaların təşviqi məqsədilə keçirilib.
Tədbirin əsas məqsədi gənclərin ekoloji problemlərə diqqətini artırmaq, onların texnologiya əsaslı innovativ həllər üzərində düşünməsini təşviq etmək, eyni zamanda universitet mühitində startap mədəniyyətinin və sahibkarlıq düşüncəsinin inkişafına töhfə vermək olub. Müsabiqə çərçivəsində tələbələr müxtəlif sahələr üzrə yaşıl texnologiyalarla bağlı ideyalarını təqdim edərək həm ekoloji problemlərin həllinə yönəlmiş, həm də gələcəkdə real startap layihələrinə çevrilə biləcək təşəbbüslərlə çıxış ediblər.
Müsabiqədə iştirak edən komandalar tərəfindən təqdim olunan layihələr əsasən ətraf mühitin qorunması və ekoloji monitorinq texnologiyaları, plastik və digər tullantıların azaldılması və təkrar emal həlləri, bərpa olunan enerji və enerji səmərəliliyini artıran texnologiyalar, su ehtiyatlarının idarə olunması və suyun təmizlənməsi üzrə innovativ ideyalar, ağıllı şəhər və yaşıl infrastruktur konsepsiyalarına uyğun rəqəmsal həllər, həmçinin ekoloji problemlərin həlli üçün mobil tətbiqlər və rəqəmsal platformalar kimi istiqamətləri əhatə edib.
Müsabiqə müddətində iştirakçılar komandalar şəklində çalışaraq startap ideyalarını inkişaf etdirib, layihələrini təqdimat formasında münsiflər heyətinə təqdim ediblər. Layihələr innovativlik, texnoloji əsaslandırma, ekoloji təsir, tətbiq imkanları və sosial fayda kimi meyarlar əsasında qiymətləndirilib.
Tədbir çərçivəsində iştirakçılar mentor və mütəxəssislərin tövsiyələri ilə layihələrinin inkişaf etdirilməsi üçün faydalı təcrübə əldə ediblər. Bu proses gənclərin analitik düşünmə bacarıqlarının formalaşmasına, komanda işi vərdişlərinin inkişafına və innovativ yanaşma tərzinin güclənməsinə mühüm töhfə verib.
Qeyd edək ki, “Green Tech Challenge” startap müsabiqəsi Mingəçevir Dövlət Universitetində innovasiya mühitinin gücləndirilməsi, tələbələrin real problemlərin həllinə yönəlmiş layihələr üzərində işləməsi və yaşıl texnologiyalar sahəsində bilik və bacarıqlarının inkişaf etdirilməsi baxımından mühüm əhəmiyyət kəsb edir. Bu kimi təşəbbüslər gənclərin davamlı inkişaf məqsədlərinə töhfə verə biləcək ideyalarının formalaşmasına və universitetdə innovativ düşüncə mühitinin daha da genişlənməsinə xidmət edir.