2026-cı ilin 29 aprel tarixində Mingəçevir Dövlət Universitetinin (MDU) Pedaqoji fakültəsinin Elmi Şurasının növbəti iclası keçirilib. Fakültə rəhbərliyi, kafedra müdirləri, professor-müəllim heyəti və məsul şəxslərin iştirakı ilə təşkil olunan iclasda fakültənin tədris, təşkilati və metodiki fəaliyyətinə dair aktual məsələlər geniş müzakirə olunub, gündəlikdə duran məsələlər üzrə hesabatlar dinlənilib və müvafiq qərarlar qəbul edilib.

İclasın gündəliyinə uyğun olaraq ilk olaraq tələbələrin dərsə davamiyyəti və biliklərinin qiymətləndirilməsinin mövcud vəziyyəti müzakirə olunub. Tədris prosesində davamiyyət göstəricilərinin yüksəldilməsi, tələbələrin dərslərdə fəallığının artırılması və biliklərin obyektiv qiymətləndirilməsinin fakültənin əsas prioritetlərindən olduğu vurğulanıb. Bu istiqamətdə davamiyyətə nəzarət mexanizmlərinin təkmilləşdirilməsi, tələbələrlə fərdi işin gücləndirilməsi və qiymətləndirmə prosesində şəffaflığın təmin edilməsinin vacibliyi qeyd edilib.

Daha sonra tələbələr arasında keçirilmiş rəy sorğularının nəticələri təhlil olunub. Sorğular vasitəsilə tələbələrin tədris prosesi, müəllim fəaliyyəti, dərs materiallarının keyfiyyəti və ümumi akademik mühitlə bağlı fikirləri öyrənilib. Təhlil nəticəsində əldə olunan müsbət məqamlarla yanaşı, inkişaf etdirilməli istiqamətlər də diqqətə çatdırılıb. Bildirilib ki, tələbə məmnunluğunun artırılması və tədris keyfiyyətinin yüksəldilməsi baxımından bu cür sorğular mühüm əhəmiyyət kəsb edir.

İclasda tyutorların fəaliyyəti barədə də geniş məlumat təqdim olunub. Tyutorların tələbələrin akademik inkişafında, tədris prosesinə adaptasiyasında və sosial məsələlərinin həllində mühüm rol oynadığı qeyd edilib. Bu sahədə fəaliyyətin daha səmərəli təşkili, tyutor-tələbə əlaqələrinin gücləndirilməsi və işin sistemli şəkildə qurulması ilə bağlı təkliflər irəli sürülüb.

Gündəlikdə yer alan mühüm məsələlərdən biri də laboratoriya işlərinin və kollokviumların yerinə yetirilməsinə nəzarətlə bağlı olub. Tədris planına uyğun olaraq laboratoriya məşğələlərinin vaxtında və keyfiyyətli icrası, kollokviumların akademik tələblərə uyğun keçirilməsi və tələbələrin praktiki bacarıqlarının inkişaf etdirilməsi istiqamətində görülən işlər müzakirə edilib. Bu sahədə nəzarətin daha da gücləndirilməsinin vacibliyi vurğulanıb.

Açıq dərslərin keçirilməsi vəziyyəti ilə bağlı təqdim olunan məlumatda fakültədə müasir tədris metodlarının tətbiqi, müəllimlərin pedaqoji ustalığının artırılması və təcrübə mübadiləsinin genişləndirilməsi baxımından açıq dərslərin əhəmiyyətindən bəhs olunub. Qeyd edilib ki, açıq dərslər həm müəllimlərin peşəkar inkişafına, həm də tədris prosesinin keyfiyyətinin yüksəldilməsinə mühüm töhfə verir.

İclasın sonunda cari məsələlər ətrafında fikir mübadiləsi aparılıb, fakültənin fəaliyyətinin daha da təkmilləşdirilməsi istiqamətində təkliflər səsləndirilib və müvafiq qərarlar qəbul olunub. Elmi Şura üzvləri qarşıya qoyulan vəzifələrin icrası üçün birgə fəaliyyətin davam etdirilməsinin vacibliyini vurğulayıblar.