MDU-nun iştirak etdiyi növbəti Erasmus+ layihəsinin icrasına start verilib

  • Рубрика записиBeynəlxalq

2023-cü ilin mayın 15-də Azərbaycan Dövlət İqtisad Univesitetində (UNEC) Mingəçevir Dövlət Universitetinin (MDU) də tərəfdaşı olduğu “Azərbaycan universitetlərində yaşıl və davamlı qlobal iqtisadi təkmilləşdirmə: bərpa olunan enerji mənbələri və iqlim dəyişikliyinin mitiqasiyası (REFRESH)” adlı Erasmus+ layihəsinin təqdimatı keçirilib.

Təqdimat mərasimində Avropa İttifaqının Azərbaycandakı səfiri Peter Mixalko, Energetika Nazirliyi yanında Bərpa Olunan Enerji Mənbələri Dövlət Agentliyinin direktoru Cavid Abdullayev, Erasmus+ Azərbaycan Milli Ofisinin direktoru Pərviz Bağırov, tərəfdaş universitetlərin rektorları və digər qonaqlar iştirak ediblər.

UNEC-in rektoru professor Ədalət Muradov qonaqları salamlayaraq, layihə barədə məlumat verib. Bildirib ki, ümumi dəyəri 703 min avro olan “REFRESH” layihəsinin məqsədi bərpa olunan enerji mənbələri üzrə universitetlərdə milli kadr hazırlığı ilə yanaşı, “Azərbaycan 2030: sosial-iqtisadi inkişafa dair Milli Prioritetlər” strateji sənədindən irəli gələn vəzifələrin icrasına mühüm töhfələr qazandırmaqdır. Layihə 3 il müddəti əhatə edir və konsorsiumu 6 yerli, 4 Avropa universiteti (İspaniyanın Barselona Universiteti, İtalyanın Bolonya Universiteti, İsveçin Royal Texnologiya Universiteti, Danimarka Texniki Universiteti) və qeyri-hökumət təşkilatı olmaqla, 15 tərəfdaşdan ibarətdir. Rektor layihənin Azərbaycanın dayanıqlı inkişafına mühüm töhfələr qazandıracağından əminliyini ifadə edib.

Avropa İttifaqının Azərbaycandakı səfiri Peter Mixalko yaşıl iqtisadiyyat və bərpa olunan enerji mənbələrinin dünyada prioritet istiqamətlərdən olduğunu diqqətə çatdıraraq, UNEC-in koordinatoru olduğu layihəni bu baxımdan yüksək qiymətləndirib. Həmçinin universitetlərin bu cür layihələrdə iştirakının əhəmiyyətli olduğunu, ölkə üçün yeni kadrların hazırlanmasında mühüm rol oynayacağını vurğulayıb. Erasmus+ proqramının büdcəsinin 30 milyard avro olduğunu qeyd edən səfir, ölkə universitetlərini layihələrdə fəal iştirak etməyə çağırıb.

Layihənin icrasına başlanılması münasibətilə UNEC ailəsini, eləcə də layihənin bütün tərəfdaşlarını təbrik edən MDU-nun rektoru Şahin Bayramov seçilmiş mövzunun aktuallığından söhbət açıb. Təmiz ətraf mühit və “yaşıl artım” ölkəsinin Azərbaycanın sosial-iqtisadi inkişaf prioritetlərindən biri olduğunu vurğulayan Ş.Bayramov yaxın perspektivdə ölkəmizdə bərpa olunan enerji mənbələrindən və yaşıl texnologiyalardan istifadənin artacağını, bununla bağlı müvafiq sahələrdə keyfiyyətli kadr hazırlığına böyük ehtiyacın yaranacağını diqqətə çatdırıb. Bütün bunların ali təhsil müəssisələri üçün yeni vəzifələr müəyyən etdiyini bildirən rektor yaşıl konseptin və davamlı inkişaf təfəkkürünün tədris, tədqiqat, innovasiya və sosial fəaliyyətlərdə əksini tapmasında sözügedən layihənin önəmindən bəhs edib. Davamlı inkişaf əsaslı universitetə çevrilməyi strateji məqsədlərindən biri kimi müəyyən edən MDU-nun REFRESH layihəsində tərəfədaşlığa cəlb edilməsindən məmnunluğunu ifadə edən Ş.Bayramov yaradılan imkanlara və göstərilən dəstəyə görə təşəkkürünü bildirib, layihə komandasına uğurlar arzulayıb.

Tədbirdə, həmçinin, Energetika Nazirliyi yanında Bərpa Olunan Enerji Mənbələri Dövlət Agentliyinin direktoru Cavid Abdullayev, Erasmus+ Azərbaycan Milli Ofisinin direktoru Pərviz Bağırov, Lənkəran Dövlət Universitetinin rektoru Natiq İbrahimov, Sumqayıt Dövlət Universitetinin rektoru Elxan Hüseynov və Azərbaycan Texnologiya Universitetinin rektor əvəzi Yaşar Ömərov çıxış edərək layihənin əhəmiyyətindən danışıblar.

Qeyd edək ki, MDU-da Avropa İttifaqının “Erasmus+” proqramı çərçivəsində həm tələbə və müəllim mübadiləsi, həm də potensialın gücləndirilməsi layihələrində fəal iştiraka xüsusi önəm verilir. Ötən ilin sentyabrında MDU-nun koordinatorluğu ilə hazırlanmış və təqdim edilmiş “Azərbaycan ali təhsil müəssisələrində sahibkarlıq ekosisteminin gücləndirilməsi” (ENGAGE) adlı “Erasmus+” layihəsi Avropa Komissiyası tərəfindən maliyyələşdirmə üçün qəbul edilib və icrasına başlanılıb. Bunlarla yanaşı, MDU İtaliyanın Floggia Universitetinin koordinatorluğu ilə “Virtual Gənclər Biznes Habları Beynəlxalq Şəbəkəsi” (VEHUB4YOU), Xəzər Universitetinin koordinatorluğu ilə “Azərbaycanda İnstitusional Repozitorlar Şəbəkəsi vasitəsilə Tədqiqat Bacarıqlarının İnkişafı” (DIRNA) və UNEC-in koordinatorluğu ilə REFRESH adlı “Erasmus+” layihələrində tərəfdaş olaraq qəbul edilib.