Mingəçevir Dövlət Universitetində (MDU) 2024/2025-ci tədris ilinin payız semestrinin 6 yanvar tarixində başlayan imtahan sessiyası 31 yanvar 2025-ci il tarixində uğurla başa çatıb. Məlumat verildiyi kimi, MDU-da bütün imtahanlar əyani formada təşkil olunub.
Növbəti semestr başlayanadək mövcud qanunvericiliyin tələbləri gözlənilməklə akademik borcu qalan tələbələrə təkrar imtahan vermək üçün şərait yaradılıb.

Azərbaycan Respublikasının Elm və təhsil nazirinin müvafiq əmrinin tələbləri çərçivəsində təşkil olunan sessiya ərzində İmtahan Qərargahının, “Qaynar xətt”in və Apellyasiya Komissiyasının fəaliyyəti təmin olunub. “İmtahanlara dəstək qrupu” imtahan prosesinin səmərəli təşkilində yaxından iştirak edib. Valideynlərin və ictimaiyyət nümayəndələrinin imtahan sessiyasında iştirakı təmin edilib. Hər həftə keçirilən “Açıq qapı” Günündə universitetin rektor vəzifəsini müvəqqəti icra edən, Təhsil məsələləri üzrə prorektor Üzeyir Zeynalov tələbələri və valideynləri maraqlandıran sualları cavablandırıb.