Mingəçevir Dövlət Universitetinin Fizika və Ekologiya kafedrasının müəllimi Gülgün İsrəfilova Mingəçevir Gənclər Evində “Torpaq resurslarının monitorinqi və qorunması” mövzusunda təlim keçirmişdir.

Təlimin əsas məqsədi torpaq resurslarının ekosistem və cəmiyyət üçün strateji əhəmiyyətini elmi əsaslarla izah etmək, torpağın mövcud vəziyyətinin qiymətləndirilməsi, dəyişikliklərin sistemli şəkildə izlənilməsi və mühafizə tədbirlərinin düzgün planlaşdırılması üzrə iştirakçıların bilik və bacarıqlarını artırmaq olmuşdur.

Təlim çərçivəsində torpaq monitorinqinin nəzəri əsasları, məqsədləri və vəzifələri təqdim edilmiş, torpaq örtüyündə baş verən fiziki, kimyəvi və bioloji dəyişikliklərin müəyyən edilməsi üsulları izah edilmişdir. İştirakçılar eroziya, şoranlaşma, bataqlaşma, çirklənmə, struktur pozuntusu və münbitliyin azalması kimi torpaq deqradasiyası proseslərini vaxtında aşkar etmək və qarşısını almaq üçün elmi əsaslandırılmış tədbirlər hazırlamaq bacarığı qazanmışlar.

Eyni zamanda, təlimdə torpaq resurslarının idarə olunmasında müasir yanaşmalar – coğrafi informasiya sistemləri (CİS), uzaqdan zondlama texnologiyaları, laborator analiz metodları və sahə tədqiqatlarının tətbiqi imkanları izah edilmişdir. Bu yanaşma torpaq haqqında toplanmış məlumatların düzgün təhlili və qərar qəbuletmə prosesində səmərəli istifadəsini təmin edir.

Təlimin digər məqsədi dayanıqlı torpaq idarəçiliyi prinsiplərinin mənimsədilməsi, torpaq ehtiyatlarının qorunması ilə ərzaq təhlükəsizliyi, biomüxtəlifliyin saxlanılması və ekoloji tarazlığın təmin olunması arasındakı əlaqənin dərk edilməsidir. İştirakçılar torpaq resurslarının yalnız iqtisadi deyil, həm də ekoloji və sosial dəyərini anlayaraq məsuliyyətli yanaşma formalaşdırmışlar.

Nəticə etibarilə, bu təlim torpaq resurslarının uzunmüddətli qorunmasına, səmərəli istifadəsinə və gələcək nəsillər üçün sağlam torpaq fondunun saxlanılmasına xidmət edən peşəkar və analitik düşüncə qabiliyyətinin inkişafını təmin etmişdir.