Mingəçevir Dövlət Universitetində tələbələrin kampusdaxili hərəkət imkanlarının genişləndirilməsi və ekoloji dayanıqlılıq təşəbbüslərinin gücləndirilməsi məqsədilə yeni elektrik skuterləri tələbələrin istifadəsinə təqdim olunub.

Universitetdə həyata keçirilən bu təşəbbüs MDU-nun yaşıl kampus konsepsiyası, karbon emissiyalarının azaldılması və dayanıqlı nəqliyyat sistemlərinin təşviqi istiqamətində həyata keçirdiyi fəaliyyətlərin davamı kimi qiymətləndirilir. Yeni skuterlər tələbələrin kampus daxilində daha rahat, təhlükəsiz və sürətli hərəkət etməsinə şərait yaratmaqla yanaşı, ətraf mühitə zərərsiz nəqliyyat vasitələrinin istifadəsini də təşviq edir.

Qeyd olunub ki, layihənin əsas məqsədi tələbələr arasında ekoloji düşüncə tərzinin formalaşdırılması, alternativ nəqliyyat vasitələrindən istifadənin artırılması və universitet mühitində “yaşıl həyat tərzi” mədəniyyətinin daha da gücləndirilməsidir.

Tələbələr tərəfindən böyük maraqla qarşılanan yeni təşəbbüs kampus ərazisində avtomobil istifadəsinin azaldılmasına, enerji səmərəliliyinin artırılmasına və ekoloji cəhətdən təmiz universitet mühitinin formalaşdırılmasına töhfə verəcək.

MDU rəhbərliyi tərəfindən bildirilib ki, gələcək mərhələlərdə universitetdə yaşıl nəqliyyat infrastrukturunun daha da genişləndirilməsi, velosiped və digər ekoloji nəqliyyat vasitələrinin sayının artırılması istiqamətində əlavə layihələrin həyata keçirilməsi nəzərdə tutulur.