Mingəçevir Dövlət Universitetində təhsil və istehsalat mühiti arasında əlaqələrin möhkəmləndirilməsi, tələbələrin əmək bazarına daha hazırlıqlı şəkildə daxil olmasına dəstək verilməsi və praktiki məşğulluq imkanları haqqında məlumatlılığın artırılması məqsədilə “Universitet–Sənaye Əməkdaşlığı və Praktiki Məşğulluq Modelləri” mövzusunda təlim təşkil olunub.

Tədbir universitetin Ömürboyu Təhsil Məktəbinin təşəbbüsü ilə həyata keçirilib və tələbələr, gənc mütəxəssislər, eləcə də karyera inkişafı ilə maraqlanan digər iştirakçılar üçün nəzərdə tutulub.

Təlim zamanı iştirakçılara universitetlə sənaye müəssisələri arasında əməkdaşlığın müasir təhsil sistemində rolu və əhəmiyyəti haqqında ətraflı məlumat verilib. Xüsusilə nəzəri biliklərin real iş mühitində tətbiqi, tələbələrin istehsalat təcrübəsi proqramlarında iştirakı, müəssisələrlə birgə layihələrin hazırlanması və dual təhsil modellərinin tətbiqi kimi məsələlər diqqət mərkəzində olub.

Sessiya çərçivəsində iştirakçılar müxtəlif ölkələrdə tətbiq olunan universitet–sənaye əməkdaşlığı nümunələri ilə tanış olublar və bu əməkdaşlıq modellərinin gənclərin məşğulluq imkanlarının artırılmasına təsiri barədə məlumat əldə ediblər. Eyni zamanda praktiki təcrübə proqramlarının təşkili, işə hazırlıq prosesinin planlaşdırılması və əmək bazarının tələblərinə uyğun bacarıqların inkişaf etdirilməsi ilə bağlı praktiki yanaşmalar təqdim edilib.

Təlim interaktiv müzakirələr və fikir mübadiləsi şəraitində davam edib, iştirakçılar mövzu ilə bağlı suallarını səsləndirmək və mütəxəssislərlə fikir mübadiləsi aparmaq imkanı əldə ediblər. Bu isə gənclərin karyera planlaşdırılması prosesinə daha şüurlu yanaşmasına və real əmək bazarı ilə bağlı anlayışlarının genişlənməsinə şərait yaradıb.

Qeyd edək ki, Mingəçevir Dövlət Universitetində təhsil və sənaye əməkdaşlığının gücləndirilməsi, tələbələrin praktiki bilik və bacarıqlarının artırılması və onların əmək bazarına inteqrasiyasının dəstəklənməsi istiqamətində bu kimi maarifləndirici təlimlər mütəmadi olaraq təşkil olunur.