Mingəçevir Dövlət Universitetinin təşəbbüsü ilə yeni beynəlxalq elmi jurnal – “Journal of Scientific Vectors” (Elmi Vektorlar Jurnalı) akademik ictimaiyyətə təqdim olunub. Jurnalın ilk buraxılışı – Volume 1, Issue 1 (2026) artıq nəşr edilərək elmi dövriyyəyə daxil edilib.
Müasir akademik nəşr standartlarına uyğun şəkildə formalaşdırılan jurnal struktur, dizayn və məzmun baxımından beynəlxalq elmi platformaların tələblərinə cavab verir və rəqəmsal inkişaf imkanları ilə seçilir.
“Journal of Scientific Vectors” rəyçilər tərəfindən qiymətləndirilən (peer-reviewed) beynəlxalq elmi jurnal kimi əsasən iki prioritet istiqaməti əhatə edir: iqtisadiyyat və enerji mühəndisliyi. Jurnal bu sahələrin kəsişməsində yerləşən aktual problemlərin elmi əsaslarla araşdırılmasını və yeni biliklərin formalaşdırılmasını hədəfləyir.
Nəşr aşağıdakı istiqamətlər üzrə tədqiqatları təşviq edir:
- davamlı iqtisadi inkişaf və yaşıl iqtisadiyyat
- enerji sistemlərinin transformasiyası
- ekonometrik modelləşdirmə və data analitikası
- süni intellektin iqtisadiyyat və enerji sahələrində tətbiqi
- enerji səmərəliliyi və innovativ texnologiyalar
Bu yanaşma jurnalı interdisiplinar elmi platforma kimi səciyyələndirir və qlobal çağırışlara cavab verən tədqiqatların təşviqinə xidmət edir.
Jurnalın redaksiya heyəti ABŞ, Böyük Britaniya, Almaniya, İtaliya, Koreya və Çin daxil olmaqla müxtəlif ölkələrin nüfuzlu universitetlərini təmsil edən alimlərdən formalaşdırılıb. Bu isə nəşrin beynəlxalq akademik etibarlılığını və elmi səviyyəsini təmin edən əsas amillərdəndir.
Jurnalda məqalələrin ingilis dilində dərc olunması onun qlobal elmi mühitə inteqrasiyasını genişləndirir və beynəlxalq oxucu auditoriyasına çıxış imkanlarını artırır.
“Journal of Scientific Vectors” beynəlxalq rəyçi sisteminə əsaslanan, müasir tədqiqat metodologiyalarını təşviq edən və elmi etik prinsiplərə uyğun fəaliyyət göstərən platforma kimi universitetin elmi fəaliyyətində yeni mərhələnin başlanğıcını ifadə edir.
Bu təşəbbüs Mingəçevir Dövlət Universitetində elmi potensialın gücləndirilməsi, beynəlxalq akademik əməkdaşlığın genişləndirilməsi və Azərbaycan ali təhsilinin qlobal elmi məkanla inteqrasiyasının dərinləşdirilməsi istiqamətində atılan mühüm addımlardan biri kimi qiymətləndirilir.