Mingəçevir Dövlət Universitetində “İqlim Həftəsi: Dayanıqlı Gələcək üçün İqlim Dəyişikliyinə Qarşı Mübarizə” adlı tədbir uğurla təşkil olunub. Proqram çərçivəsində Ekologiya və Ətraf Mühit Mühəndisliyi ixtisası üzrə təhsil alan tələbələrin hazırladıqları layihələr əsasında müxtəlif maketlər, posterlər və digər vizual materiallar nümayiş etdirilib.
Sərgi zamanı tələbələr iqlim dəyişikliklərinin ekoloji və sosial təsirləri, dayanıqlı inkişaf prinsipləri, resurslardan səmərəli istifadə və ətraf mühitin qorunması ilə bağlı elmi-praktik yanaşmalarını təqdim ediblər. Təqdim olunan işlər mövzunun aktuallığını əks etdirməklə yanaşı, tələbələrin analitik düşünmə, tədqiqat və təqdimat bacarıqlarını da nümayiş etdirib.
Tədbir iqlim dəyişikliyi ilə bağlı maarifləndirmənin artırılması, tələbələrin elmi fəaliyyətə cəlb olunması və dayanıqlı gələcək üçün innovativ ideyaların təşviqi baxımından mühüm əhəmiyyət daşıyıb. Təqdim olunan layihələr müasir ekoloji problemlərə innovativ həlləri, elmi-praktik əsaslandırmaları və dayanıqlı inkişaf prinsiplərinə uyğunluğu ilə diqqət çəkib.
Layihələrin Qısa Xülasəsi
- “Green Life” komandası sənaye müəssisələrindən yaranan zərərli emissiyaların müəyyənləşdirilməsi və azaldılması üzərində fokuslanıb. Layihədə qaz analizatorlarından istifadə edilərək emissiyaların tərkibi təhlil olunub və qazların daha az zərərli formaya çevrilməsi üçün filtrasiya sistemləri təqdim edilib. Bu yanaşma atmosfer çirklənməsinin azaldılmasına və sənaye ekoloji təhlükəsizliyinə töhfə verir.
- “Natura Builder” komandası təbiətlə müasir memarlığın inteqrasiyasını əks etdirən “Yaşıl Bina” konsepsiyasını təqdim edib. Layihədə günəş panelləri, təbii soyutma və havanın təmizlənməsi üçün vertikal yaşıllaşdırma, yağış sularının toplanması və təbii işıqdan maksimum istifadə kimi enerji səmərəli və ekoloji dayanıqlı həllər nümayiş olunub.
- “Ecolider” komandası enerji istehsalı və suya qənaət üzrə innovativ layihə təqdim edib. Layihədə insan hərəkətindən yaranan mexaniki enerjinin elektrik enerjisinə çevrilməsi üçün piezoelektrik panellərin və su itkisinin minimuma endirilməsi üçün sensor əsaslı avtomatik klapan sistemlərinin tətbiqi nəzərdə tutulub.
- “Ecologists” komandası akvaponika sisteminə əsaslanan “BioAquaponics Mini-Module” layihəsini təqdim edib. Bu sistemdə balıq və bitkilər simbioz şəraitində yetişdirilir: balıq tullantıları bitkilər üçün qida rolunu oynayır, bitkilər isə suyu təmizləyərək balıqlar üçün uyğun mühit yaradır. Qapalı dövriyyə sistemi su sərfiyyatını əhəmiyyətli dərəcədə azaldır və həm təhsil, həm də ekoloji istehsal baxımından faydalıdır.
- “Natural Pulse” komandası “EcoRhythm” layihəsi ilə bərpa olunan enerji istifadəsinə diqqət yönəldib. Layihədə xüsusilə günəş enerjisi ilə işləyən elektrik nəqliyyat vasitələrinin, xüsusən avtobusların tətbiqi nəzərdə tutulur. Bu yanaşma nəqliyyat sektorunda karbon emissiyalarının azaldılmasına və alternativ enerjidən istifadənin təşviqinə xidmət edir.
- “Divergent” komandası urbanizasiya və insanların təbiətdən uzaqlaşması probleminə cavab olaraq qapalı şüşə konstruksiyalı mini-ekosistem layihəsi təqdim edib. Layihədə su hövzələri, tropik bitkilər və müxtəlif canlı komponentlər yer alır. Məkan həm rekreasiya, həm də elmi müşahidə imkanları təqdim etməklə yanaşı, şəhər mühitində innovativ ekoloji maarifləndirmə sahəsi kimi nəzərdə tutulub.
- “Ecotecture” komandası şəhər mühitində istilik enerjisindən səmərəli istifadəni hədəfləyən “Eco-Asphalt” sistemini təqdim edib. Layihə asfalt səthində günəş radiasiyasından toplanan istilik enerjisinin enerji istehsalına yönləndirilməsini və şəhərlərdə “istilik adası effekti”nin azaldılmasını nəzərdə tutur.
- “Aerox” komandası karbonmonoksid (CO) təhlükəsinin erkən aşkarlanması üçün ağıllı qoruyucu sistem hazırlayıb. Sistem yalnız xəbərdarlıq etməklə kifayətlənmir, eyni zamanda havalandırma və filtrasiya sistemlərini aktivləşdirir, məsul şəxslərə bildiriş göndərir və beləliklə passiv xəbərdarlıqdan aktiv müdaxilə modelinə keçidi təmin edir.
- “EcoConcrete” layihəsi binalardakı çatların insan müdaxiləsi olmadan avtomatik bərpasını təmin edən özünü bərpa edən beton texnologiyasına əsaslanır. Material daxilində yerləşdirilmiş xüsusi kapsullar çatlar yarandıqda aktivləşərək boşluqları doldurur və konstruksiyanın möhkəmliyini bərpa edir. Bu yanaşma binaların istismar müddətini artırır, texniki xidmət xərclərini azaldır və resurslardan səmərəli istifadəyə şərait yaradır.
- “Smart Village” komandası Mingəçevir regionunda kənd təsərrüfatı və yaşayış məkanlarına müasir texnologiyaların inteqrasiyasını hədəfləyən “Ağıllı Kənd” layihəsini təqdim edib. Layihəyə dron monitorinqi, sensor əsaslı avtomatik suvarma, günəş və bioqaz enerjisi istehsalı, yüksək sürətli internet, telemedicina və onlayn təhsil kimi rəqəmsal həllər daxildir.
- “BlueGuard” layihəsi su hövzələrinin qorunmasına yönəlmiş ekoloji dayanıqlı su nəqliyyatı təşəbbüsüdür. Layihə sərnişin daşımaları, alternativ enerji istifadəsi, tullantı sularının təmizlənməsi, məişət tullantılarının idarə olunması və su səthindəki çirkləndiricilərin toplanmasını bir sistemdə birləşdirərək ətraf mühitə minimum təsir göstərən müasir ekoloji nəqliyyat modeli təqdim edir.
Ümumilikdə, təqdim olunan layihələr tələbələrin ekoloji problemlərə yaradıcı və elmi yanaşmalarını nümayiş etdirərək dayanıqlı inkişaf məqsədlərinə uyğun praktik həllərin hazırlanmasının mümkünlüyünü göstərib.