Mingəçevir Dövlət Universitetində sahibkarlıq təşəbbüslərinin təşviqi, məhdud resurslarla effektiv biznes modellərinin qurulması bacarıqlarının inkişaf etdirilməsi və tələbələrin iqtisadi düşüncə qabiliyyətinin gücləndirilməsi məqsədilə “Kiçik Kapital – Böyük Gəlir” mövzusunda startap yarışı keçirilib.

İqtisadiyyat kafedrasının təşəbbüsü ilə təşkil olunan yarış iştirakçıların minimal kapital ilə dayanıqlı və gəlirli biznes ideyaları formalaşdırmasına yönəlib. Tədbir universitetdə innovativ sahibkarlıq mühitinin inkişafına və tələbələrin praktik biliklərinin artırılmasına mühüm töhfə verib.

Tədbir çərçivəsində çıxış edənlər məhdud resurslar şəraitində effektiv idarəetmənin və düzgün biznes strategiyasının əhəmiyyətini vurğulayıblar. Bildirilib ki, müasir iqtisadi mühitdə uğurlu biznes qurmaq üçün yalnız maliyyə resursları deyil, eyni zamanda kreativ yanaşma, bazar analizi və çevik qərarvermə bacarıqları mühüm rol oynayır.

Startap yarışı çərçivəsində tələbə komandaları az büdcə ilə maksimum nəticə əldə etməyə imkan verən innovativ biznes yanaşmaları üzərində çalışıblar. İştirakçılar resursların səmərəli idarə olunması, xərclərin optimallaşdırılması, bazar ehtiyaclarına uyğun çevik biznes modellərinin qurulması və rəqəmsal platformalar vasitəsilə gəlir əldə etmə imkanlarını əhatə edən müxtəlif istiqamətlər üzrə layihələr təqdim ediblər.

Yarışmanın yekun mərhələsində təqdim olunan layihələr münsiflər heyəti tərəfindən qiymətləndirilib. Qiymətləndirmə zamanı ideyaların innovativliyi, real bazar şəraitinə uyğunluğu, maliyyə baxımından əsaslandırılması və gəlir potensialı əsas meyarlar kimi nəzərə alınıb. Münsiflər heyəti tərəfindən seçilən ən uğurlu və perspektivli layihələr xüsusi olaraq qeyd olunub, iştirakçılara isə layihələrinin gələcək inkişafı ilə bağlı tövsiyələr verilib.

Tədbirdə universitet rəhbərliyinin nümayəndələri, kafedra müəllimləri və iqtisadiyyat sahəsində mütəxəssislər iştirak ediblər.

Qeyd edək ki, “Kiçik Kapital – Böyük Gəlir” startap yarışı tələbələrin sahibkarlıq ruhunun gücləndirilməsi, onların praktiki iqtisadi düşüncəyə təşviq edilməsi və real biznes mühitinə hazırlanması baxımından mühüm əhəmiyyət kəsb edir. Mingəçevir Dövlət Universiteti bu kimi təşəbbüslərlə tələbələrin innovativ potensialının inkişafına və sahibkarlıq fəaliyyətinə inteqrasiyasına dəstək göstərməkdə davam edir.