Mingəçevir Dövlət Universitetində ekoloji davamlılıq, biomüxtəlifliyin qorunması və yaşıl kampus strategiyası çərçivəsində “MDU Toxum Bankı” istifadəyə verilib. Yeni təşəbbüs universitetdə dayanıqlı ekoloji idarəetmə sisteminin gücləndirilməsi, genetik ehtiyatların qorunması və yaşıl universitet modelinin inkişaf etdirilməsi istiqamətində həyata keçirilən mühüm layihələrdən biridir.

Toxum bankında hazırda 50-dən çox müxtəlif toxum nümunəsi toplanılıb. Buraya region üçün əhəmiyyətli kənd təsərrüfatı bitkiləri, dekorativ və yerli flora növlərinə aid toxumlar daxildir. Toplanan nümunələr xüsusi qoruma şəraitində saxlanılır və sistemli şəkildə qeydiyyata alınır.

Layihənin əsas məqsədi bitki genetik ehtiyatlarının qorunması, biomüxtəlifliyin dəstəklənməsi, ekoloji maarifləndirmənin artırılması və tələbələrin yaşıl təşəbbüslərə cəlb edilməsidir. Eyni zamanda toxum bankı tələbə və tədqiqatçılar üçün elmi-praktik baza rolunu oynayacaq.

MDU-da yaradılan toxum bankı aşağıdakı istiqamətlər üzrə mühüm töhfə verir:

• Biomüxtəlifliyin qorunması;

• Dayanıqlı yaşıl kampus təşəbbüsləri;

• Ekoloji təhsil və tədqiqat fəaliyyəti;

• İqlim dəyişikliklərinə qarşı davamlılıq siyasəti;

• Yerli ekosistemlərin və genetik resursların mühafizəsi.

Gələcək mərhələdə toxum bankının daha da genişləndirilməsi, regional flora nümunələrinin artırılması, tələbələrin iştirakı ilə toxum toplama aksiyalarının təşkili və beynəlxalq ekoloji platformalarla əməkdaşlığın qurulması nəzərdə tutulur.

Qeyd edək ki, “MDU Toxum Bankı” təşəbbüsü universitetin yaşıl universitet modelinə keçid strategiyası çərçivəsində həyata keçirilən innovativ ekoloji layihələrdən biridir və gələcək nəsillər üçün təbii irsin qorunmasına xidmət edir.