2026-cı ilin 18 may tarixində Mingəçevir Dövlət Universitetinin təşkilatçılığı ilə keçirilən “Dil, Təhsil, Tədqiqat və Dayanıqlılıq Sahəsində Müasir Problemlər” Beynəlxalq Elmi Konfransı çərçivəsində universitetin tələbələri tərəfindən Mingəçevir Dövlət Dram Teatrında “Səhnələşən klassika” adlı səhnəcik təqdim olunub. Tədbir yalnız akademik müzakirələrlə məhdudlaşmayaraq, bilik və yaradıcılığın vəhdətini səhnəyə daşıyıb.
Tamaşanı izləməyə konfrans iştirakçıları ilə yanaşı universitetin əməkdaşları və tələbələri də qatılıb, müxtəlif auditoriyaların bir araya gəldiyi bu görüş fikir və təcrübə mübadiləsi üçün canlı bir mühit yaradıb.
Mingəçevir Dövlət Universitetinin Ömürboyu Təhsil Məktəbinin Beynəlxalq Dil Mərkəzi və Xarici dillər kafedrasının birgə təşkilatçılığı ilə baş tutan səhnəcikdə klassik ədəbi nümunələr əsasında hazırlanmış kompozisiyalar tələbələr tərəfindən ingilis dilində təqdim edilib. Bu çıxışlar gənclərin dil bacarıqlarını inkişaf etdirməklə yanaşı, onların dünyagörüşünün genişlənməsinə, fərqli mədəniyyətlərə açıq və məsuliyyətli yanaşmanın formalaşmasına töhfə verib.
Tamaşa iştirakçılar tərəfindən böyük maraqla qarşılanıb, səhnə çıxışları alqışlarla müşayiət olunub. Tədbir tələbələrin yaradıcılıq potensialının üzə çıxarılması, özünüifadə imkanlarının genişləndirilməsi və inklüziv, iştirakçı təhsil mühitinin təşviqi baxımından əhəmiyyətli olub. Eyni zamanda, səhnə mədəniyyətinin inkişafı və interaktiv tədris metodlarının tətbiqi istiqamətində praktik nümunə kimi diqqət çəkib.
“Səhnələşən klassika” təqdimatı konfransın ümumi ideyasına uyğun olaraq dil tədrisinin innovativ və tətbiq yönümlü üsullarla zənginləşdirilməsinə xidmət edib, gənclərin həm bilik, həm də dəyər əsaslı inkişafına yönəlmiş yanaşmanın vacibliyini bir daha ön plana çıxarıb.