2025-ci il 15 yanvar tarixində Mingəçevir Dövlət Universitetinin (MDU) Təhsil fakültəsinin tələbələri və universitetin əməkdaşı İlhamə Məmmədova Mingəçevir şəhərinin Şəhidlər xiyabanına səfər ediblər.
Ziyarət zamanı vətən uğrunda canından keçən şəhidlərin məzarları üzərinə gül dəstələri qoyulub, onların xatirəsi böyük ehtiramla yad edilib. Bu səfər, Vətənimizin ərazi bütövlüyü və müstəqilliyi uğrunda şəhid olmuş qəhrəmanlara minnətdarlığın ifadəsi kimi həyata keçirilib.

Universitet nümayəndələri xiyabanda yerləşən “20 Yanvar Şəhidləri”, “Azərbaycanlıların Soyqırımı və “İtkinlər” xatirə komplekslərini də ziyarət edərək, xalqımızın tarixində baş vermiş mühüm hadisələrə şahidlik edən məkanlarla bağlı məlumat əldə ediblər.

MDU tərəfindən şəhidlərin xatirəsinin əbədiləşdirilməsi, onların qəhrəmanlıqlarının gələcək nəsillərə çatdırılması məqsədilə mütəmadi tədbirlər təşkil olunur. Bu istiqamətdə universitet gənclərə milli ruhun aşılanması və vətənpərvərlik dəyərlərinin təbliği üçün xüsusi əhəmiyyət verir.