Mingəçevir Dövlət Universitetində elm, maarifçilik, ekoloji məsuliyyət və dayanıqlı inkişaf dəyərlərinin təşviqi istiqamətində “Sabah üçün Oxuyun – Mingəçevir Dövlət Universitetinin Davamlı Kitab Yarmarkası” (“Read for Tomorrow – Mingachevir State University Sustainable Book Fair”) çərçivəsində “Green Book Exchange – Bring Your Old Book” adlı dayanıqlı kitab paylaşım təşəbbüsü həyata keçirilir.
2026-cı ilin 20–22 may tarixlərini əhatə edən yarmarka MDU-da oxu mədəniyyətinin təşviqi, bilik resurslarına əlçatanlığın genişləndirilməsi, təhsil mühitində maarifçilik fəaliyyətinin gücləndirilməsi və universitet–cəmiyyət əməkdaşlığının inkişafına töhfə vermək məqsədi daşıyır. Yarmarkanın əsas komponentlərindən biri olan “Bring Your Old Book” stendi kitab mübadiləsi vasitəsilə resurslardan səmərəli istifadə, təkrar paylaşım və ekoloji məsuliyyət prinsiplərinin təşviqinə xidmət edir.
Təşəbbüs çərçivəsində tələbələr, akademik və inzibati heyət üzvləri istifadə etdikləri kitabları xüsusi ayrılmış stendə təqdim edərək digər oxucularla paylaşırlar. Bədii, elmi, texniki və maarifləndirici sahələri əhatə edən nəşrlərin yer aldığı kitab mübadilə platforması universitetdə intellektual mühitin zənginləşdirilməsi, sosial həmrəyliyin möhkəmləndirilməsi və bilik paylaşımının davamlılığının təmin olunması baxımından mühüm əhəmiyyət daşıyır.
Layihə çərçivəsində kitabların yenidən istifadəsinin təşviqi kağız tullantılarının azaldılması, resurslardan məsuliyyətli istifadə və yaşıl kampus prinsiplərinin dəstəklənməsi istiqamətində MDU-nun dayanıqlı inkişaf prioritetlərinə uyğun şəkildə həyata keçirilir. Bununla yanaşı, təşəbbüs tələbələrdə mütaliə vərdişlərinin gücləndirilməsi, ömürboyu öyrənmə yanaşmasının təşviqi, ekoloji düşüncə və sosial məsuliyyət mədəniyyətinin formalaşdırılması baxımından əhəmiyyətli platforma kimi çıxış edir.
MDU-da təhsil, elm və sosial məsuliyyət dəyərlərini özündə birləşdirən bu kimi təşəbbüslərin həyata keçirilməsi universitetin innovativ, inklüziv və dayanıqlı ali təhsil mühiti formalaşdırmaq istiqamətində həyata keçirdiyi fəaliyyətlərin mühüm tərkib hissəsidir.