2026-cı il 27 fevral tarixində Mingəçevir Dövlət Universitetində Təcrübə və Karyera şöbəsinin təşkilatçılığı ilə “Xaricdə təhsil və beynəlxalq təqaüd imkanları” mövzusunda seminar keçirilib.
Seminarın əsas məqsədi bakalavr və magistratura pilləsində təhsil alan tələbələrə xaricdə təhsil imkanları, beynəlxalq təqaüd proqramları və müraciət prosedurları barədə sistemli və praktiki məlumat təqdim etmək, eləcə də onların keyfiyyətli və inklüziv ali təhsil imkanlarına çıxışını genişləndirmək olub. Tədbir həmçinin gənclərin bilik və bacarıqlarının beynəlxalq inkişafına, rəqabətqabiliyyətli insan kapitalının formalaşmasına və dayanıqlı karyera perspektivlərinin gücləndirilməsinə töhfə vermək məqsədi daşıyıb.
Tədbirin spikeri Beynəlxalq əlaqələr və əməkdaşlıq şöbəsinin koordinatoru Pərviz Məmmədurzəyev olub. O, magistr təhsilinin karyera inkişafındakı rolu, beynəlxalq akademik təcrübənin əmək bazarında yaratdığı üstünlüklər, həmçinin qlobal əməkdaşlıq şəbəkələrinin həm fərdi, həm də institusional inkişaf baxımından əhəmiyyəti barədə ətraflı məlumat verib. Bildirilib ki, xaricdə təhsil yalnız fərdi uğura deyil, eyni zamanda ölkənin intellektual potensialının güclənməsinə və bilik əsaslı cəmiyyətin inkişafına xidmət edir.
Seminar çərçivəsində aşağıdakı mövzular müzakirə olunub:
- “Türkiye Bursları” proqramına müraciət prosesi;
- Almaniyanın DAAD proqramları ilə universitetlərə birbaşa qəbul arasındakı fərqlər;
- Avropa və Asiyada əsas beynəlxalq təqaüd proqramları;
- Müraciət sənədlərinin (SOP, CV) peşəkar hazırlanması.
Təqdimat zamanı akademik nailiyyətlərlə yanaşı, sosial məsuliyyət, multikultural mühitə uyğunlaşma və beynəlxalq əməkdaşlıq mədəniyyətinin inkişaf etdirilməsinin vacibliyinə diqqət çəkilib. Qeyd olunub ki, beynəlxalq təhsil təcrübəsi innovativ düşüncə tərzini formalaşdırır, tədqiqat bacarıqlarını gücləndirir və qlobal çağırışlara çevik yanaşmanı təşviq edir.
Seminar interaktiv müzakirə formatında davam edib, iştirakçıların sualları cavablandırılıb və xaricdə təhsil almaq istəyən tələbələrə praktiki tövsiyələr təqdim olunub.
Qeyd edək ki, Mingəçevir Dövlət Universitetində tələbələrin beynəlxalq mobillik imkanlarının genişləndirilməsi, onların qlobal təhsil və əmək bazarına inteqrasiyası, bilik və bacarıqlarının davamlı inkişafının təmin olunmasına yönəlmiş təşəbbüslər sistemli və uzunmüddətli strategiyanın ayrılmaz tərkib hissəsini təşkil edir.