Mingəçevir Dövlət Universitetinin Fizika və ekologiya kafedrasının müəllimi Şəbnəm İslamova tərəfindən Özbəkistanın Səmərqənd Dövlət Universitetində suyun səmərəli istifadəsi və tullantıların azaldılması istiqamətində laboratoriya əsaslı elmi tədqiqatlar aparılıb.

Tədqiqatlar çərçivəsində su resurslarının səmərəli idarə olunması, istehlakın optimallaşdırılması və tullantıların minimuma endirilməsi ilə bağlı müasir yanaşmalar öyrənilib. Eyni zamanda, laboratoriya şəraitində innovativ metodların tətbiqi ilə resurslardan effektiv istifadə və ekoloji təsirlərin azaldılması istiqamətində praktiki nəticələr əldə olunub.

Araşdırmalar zamanı suyun təkrar istifadəsi imkanları, tullantıların idarə olunması modelləri və ekoloji baxımdan təhlükəsiz texnologiyaların tətbiqi məsələlərinə xüsusi diqqət yetirilib. Bu yanaşmaların həm akademik mühitdə, həm də real sektor üçün əhəmiyyətli perspektivlər yaratdığı vurğulanıb.

Qeyd edək ki, Mingəçevir Dövlət Universitetinin beynəlxalq elmi əməkdaşlıq çərçivəsində həyata keçirdiyi bu kimi tədqiqat fəaliyyətləri bilik və təcrübə mübadiləsinin genişlənməsinə, innovativ həllərin tətbiqinə və dayanıqlı inkişaf yönümlü yanaşmaların təşviqinə mühüm töhfə verir.