Mingəçevir Dövlət Universitetinin (MDU) Fizika və ekologiya kafedrasının gənc müəllimi Xəyalə Hüseynzadə Rusiya Federasiyasının Dubna şəhərində yerləşən Birləşmiş Nüvə Tədqiqatlar İnstitutunun (JINR) Yüksək enerjilər fizikası laboratoriyasında radiasiya mövzusunda apardığı elmi-tədqiqatını uğurla davam etdirir.

X.Hüseynzədə JINR-da apardığı elmi-tədriqat “Silisium əsaslı yeni radiasiya qeydedicilərinin işlənməsi və tətbiqi” mövzusundadır.

Səfər çərçivəsində əməkdaşımız JINR-nın elmi infrastrukturu, laboratoriyalarının fəaliyyəti, elmi-tədqiqat işlərinin xırda detalları ilə yaxından tanışlıq və institutun laboratoriyasında çalışan alimlərlə ünsiyyət qurmaq imkanı qazanıb.

Tədqiqat prosesinin gedişatından bəhs edən X.Hüseynzədə bildirib ki, JINR-nın Yüksək enerjilər fizikası laboratoriyasında yeni nəsil mikropikselli selvari fotodiodların bəzi ölçmə parametrləri – foton qeydetmə effektivliyi, amplitud ayırdetməsi, gücləndirmə əmsalı, deşilmə gərginliyi, işləmə oblastı təyin olunması üzərində tədqiqatlar aparır.

X.Hüseynzadəyə elmi-tədqiqat təcrübəsinin uğurla başa vurmasını arzulayır, məhsuldar fəaliyyətinin səmərəli olmasını diləyirik.

Qeyd edək ki, MDU-nun elmi potensialının gücləndirilməsi və əməkdaşların elmi-tədqiqat fəaliyyətinə davamlı dəstək göstərilməsi əsas prioritetlərimizdəndir.