MDU-da “AFBİA”İB və “İnvestAz investisiya şirkəti” təlim keçib

Mingəçevir Dövlət Universitetində Azərbaycan Fond Bazarı İştirakçılarının Assosiasiyası” İctimai Birliyi (AFBİA), “İnvestAz investisiya şirkəti” QSC və Mingəçevir Dövlət Universitetinin birgə təşkil etdiyi “Maliyyə bazarlarında praktik fəaliyyət” mövzusunda seminar keçirilib.

Azərbaycan Respublikası Prezidentinin “Milli iqtisadiyyat və iqtisadiyyatın əsas sektorları üzrə strateji yol xəritəsinin başlıca istiqamətləri”nin təsdiqi və bundan irəli gələn məsələlər haqqında” 2016-cı il 16 mart tarixli 1897 nömrəli Sərəncamı ilə müəyyən edilmiş vəzifələrin icra edilməsi məqsədilə “Azərbaycan Respublikasında maliyyə xidmətlərinin inkişafına dair Strateji Yol Xəritəsi” (bundan sonra – Strateji Yol Xəritəsi) hazırlanmışdır. Bu Strateji Yol Xəritəsi qlobal iqtisadiyyat və maliyyə bazarlarında müşahidə edilən proseslərə çevik adaptasiya və postneft iqtisadi inkişaf modelinin dəstəklənməsi üçün maliyyə sektoru qarşısında duran yeni çağırışlar və imkanlar nəzərə alınmaqla hazırlanmışdır. Sənəd maliyyə xidmətləri sektorunun çevikliyi, rəqabətqabiliyyətliliyi, innovativliyi və iqtisadi inkişafı dəstəkləməsi prinsipləri əsasında hazırlanmışdır.

Azərbaycanda maliyyə xidmətləri istehlakçılarının hüquqlarının təmin edilməsi və maliyyə savadlılığının artırılması ilə bağlı bir sıra işlər görülmüşdür. Bu istiqamət üzrə institusional islahatlar aparılmış, istehlakçıların hüquqlarının effektiv müdafiə mexanizmlərinin formalaşdırılmasında və əhalinin maarifləndirilməsində irəliləyişlərə nail olunmuşdur. Bununla belə, maliyyə xidmətləri sektorunun inkişafı, maliyyə vasitəçiliyinin dərinləşməsi, maliyyə sektoru və istehlakçılar arasında qarşılıqlı əlaqələrin genişlənməsi maliyyə xidmətləri istehlakçılarının maraqlarının qorunmasını və maliyyə savadlılığının artırılmasını zəruri edir.

Bununla bağlı Azərbaycanda fəaliyyət göstərən İnvestAZ şirkətinin tədris meneceri Rövşən Məmmədov və analitik Anar Qəhrəmanov maliyyə savadlılığı çərçivəsində Mingəçevir Dövlət Universitetində olub, universitetin İqtisadiyyat və idarəetmə fakültəsinin professor-müəllim heyəti, Maliyyə, Mühasibat uçotu və audit, digər iqtisadiyyat yönümlü ixtisaslar üzrə təhsil alan tələbələrlə təlim keçiblər. 

Tədbiri giriş sözü ilə İqtisadiyyat və idarəetmə fakültəsinin dekanı Nüşabə Qədimli açaraq qonaqları auditoriya iştirakçılarına təqdim edib görüşün məqsəd və mahiyyətindən bəhs edib. O seminarda iştirak edən qonaqlara və professor-müəllim və tələbə heyətinə universitetin rektoru Akif Hacıyevin salamlarını yetirmiş və seminarın işinə uğurlar diləmişdir.

İnvestAZ şirkətinin tədris meneceri Rövşən Məmmədov qeyd edib ki, İnvestAZ, Azərbaycan investisiya bazarını inkişaf etdirmək və bu bazara yeniliklər gətirmək məqsədi ilə yaradılmışdır. “İnvestAZ İnvestisiya Şirkəti” Qapalı Səhmdar Cəmiyyətinin fəaliyyəti Azərbaycan Respublikası Maliyyə Bazarlarına Nəzarət Palatası tərəfindən tənzimlənir. Şirkət, 09.01.2016-cı il tarixli 087986 saylı lisenziyası əsasında broker, anderraytinq (diler), marja ticarəti (forex), fərdi investorların portfelinin idarə edilməsi, market meykerlik və sair investisiya xidmətləri üzrə fəaliyyət göstərməkdədir.

R.Məmmədov bildirib ki, InvestAZ İnvestisiya Şirkəti ölkənin yeganə fond birjası olan Bakı Fond Birjasının həm səhmdarı, həm də üzvüdür. Şirkət gələcək ehtiyaclarını qarşılamaq üçün insan resurslarını və texnoloji infrastrukturunu inkişaf etdirmişdir.

R.Məmmədov qeyd edib ki, ölkəmiz gənc, bacarıqlı və təşəbbüskar insan kapitalına malikdir. Bu özü özlüyündə ölkədə iqtisadiyyatın bütün sahələrində inkişafı təşviq edən faktor sayılır. Neft kapitalının real bazar iqtisadiyyatına qatdığı dəyər, ümumilikdə inkişaf potensialını daha da çoxaldır. Paralel inkişafın kapital bazarında da hiss olunması üçün fәrdi investor kütlәsinin vә bazar hәcmlәrinin arzu olunan sәviyyәyә çatması lazımdır. Buna baxmayaraq investisiya dünyasındakı inkişafın nәticәsi olaraq, insanlar bir-­birindәn fәrqli investisiya vasitәlәri ilә tanış olmaqda davam edir. Bu inkişaf istər fərdi insanların həyatına, istərsə də ölkə iqtisadiyyatına müsbət təsir göstərir. İnvestisiya dilini sadələşdirməklə fərdləri cəsarətləndirmək, yaxşı təlim keçmiş investorlar yetişdirmək InvestAZ şirkətinin hədəfidir.

R.Məmmədov vurğulayıb ki, fərdi investor sayını artırmaq və korporativ investisiya vasitələrinə olan marağı oyatmaqla şirkətin, başlıca məqsədlərindən biri Azərbaycanı dünyanın maliyyə mərkəzlərindən birinə çevirməkdir. İnvestAZ, bütün əməkdaşları ilə birlikdə bu məqsədə yönəlmiş fəaliyyətini davam etdirir və davam etdirəcəkdir.

Sonra Rövşən Məmmədov Maliyyə bazarları – Birjalar haqqında, birjanın növləri, birjanın iştirakçıları; Birjada ticarətin motivləri; Maliyyə aktivlərinin alış və satışından mənfəət əldə etmək imkanı; Marjinal ticarət. Kredit çiyni; MetaTrader 4 (ticarət platforması) izahı; Analitik təhlil üsulları; Best İnvestor – yarışması haqqında geniş məlumat verib.

Təlim interaktiv şəkildə keçirilib, seminar iştirakçılarını maraqlandıran suallar cavablandırılıb.

{phocagallery view=category|categoryid=138|limitstart=0|limitcount=0}