Mingəçevir Dövlət Universitetinin (MDU) bir qrup əməkdaşları Həmrəylik Günü və Yeni il münasibətilə 44 günlük Vətən Müharibəsində şəhid olmuş, Təbriz Cümazadə, universitetin şəhid məzunları Kənan Abdullayev, Oruc Nəcəfli və Əzəmi Hüseynovun, Mingəçevirli Aprel döyüşləri şəhidləri Adil Adilzadə, Teymur Qasımov, Rüstəm Əhmədov və Rahim Tağıyevin ailələrini ziyarət ediblər. Universitetin kollektiv üzvləri, həmçinin, hazırda iki övladı MDU-da təhsil alan şəhid Yasən Əhmədovun və Niyazi İsgəndərovun da ailəsinə baş çəkiblər.
Ailə üzvləri ilə görüşlərdə ölkəmizin ərazi bütövlüyü uğrunda canından keçən şəhidlərin əziz xatirəsi dərin ehtiramla yad edilib, onların ailələrinə bayram sovqatları təqdim olunub.
Qeyd edək ki, gənclərin vətənpərvərlik ruhunda yetişdirilməsinə xüsusi əhəmiyyət verən MDU-da qəhrəman şəhidlərimizin adlarının əbədiləşdirilməsi, onların göstərdikləri şücaətlərin gənc nəsil arasında təbliğ edilməsi, şəhid ailələrinin ziyarət edilməsi diqqət mərkəzində saxlanılır.
