Məmnuniyyət hissi ilə bildirmək istəyirik ki, Mingəçevir Dövlət Universiteti “UI Greenmetric 2024”-in dünya universitetlərinin reytinq sıralamasına daxil olduğu üçün Uİ Greenmetric-in sədri cənab Professor Dr. İr. Riri Fitri Sari tərəfindən Sertifikatla təltif edilib.
“UI Greenmetric 2024” dünya universitetlərinin reytinqinə ilk dəfə müraciət edən Mingəçevir  Dövlət Universiteti (MDU) sıralamada dünya üzrə 928-ci, ölkə üzrə isə 6-cı yerdə qərarlaşmışdır. Qeyd edək ki, dünya universitetlərinin dayanıqlı inkişaf üzrə fəaliyyətini qiymətləndirən “UI Greenmetric 2024” reytinqində bu il 95 ölkədən 1477 ali təhsil müəssisəsi iştirak edib. Bu uğur, universitetimizin dayanıqlı inkişaf sahəsində göstərdiyi səylərin bariz nümunəsidir.
MDU rəhbərliyinin dəstəyi ilə Keyfiyyət təminatı və davamlı inkişaf şöbəsi tərəfindən reytinq üçün cari ilin sentyabr ayında 6 əsas istiqamət üzrə (İnfrastruktur, Enerji və İqlim dəyişikliyi, Tullantılar, Su, Nəqliyyat, Təhsil və Araşdırma) sənədlər və sübutlar toplanaraq təqdim edilib. Mingəçevir Dövlət Universitetinin rektor vəzifəsini  müvəqqəti icra edən, Tədris məsələləri üzrə prorektoru Üzeyir Zeynalov başda olmaqla, bu prosesdə dəstək olan, əməyi keçən hər kəsə dərin təşəkkürümüzü bildiririk.
Mingəçevir Dövlət Universitetinin dəyərli rəhbərliyi və bütün kollektivini  “UI Greenmetric 2024” dünya universitetlərinin reytinqi sıralamasına daxil olması münasibətilə təbrik edir, gələcəkdə bu istiqamətdə daha böyük nailiyyətlər əldə ediləcəyinə və uğurlar qazanılacağına inanırıq!