Mingəçevir Dövlət Universitetində dayanıqlı inkişaf prinsiplərinə uyğun olaraq “Qida və resurs israfının azaldılması” mövzusunda maarifləndirici kampaniya çərçivəsində silsilə fəaliyyətlər həyata keçirilib.

Kampaniyanın əsas məqsədi tələbələr və universitet ictimaiyyəti arasında qida israfının mənfi təsirləri, resurslardan səmərəli istifadə və davamlı istehlak vərdişlərinin təşviqi istiqamətində maarifləndirməni gücləndirmək olub.

Tədbir çərçivəsində iştirakçılara qida tullantılarının azaldılması yolları, gündəlik həyatda tətbiq oluna biləcək praktik yanaşmalar, eləcə də resursların qənaətli istifadəsinin əhəmiyyəti barədə ətraflı məlumat verilib. Eyni zamanda, qlobal miqyasda qida israfının yaratdığı ekoloji və iqtisadi problemlər diqqətə çatdırılıb.

Maarifləndirici kampaniya zamanı interaktiv təqdimatlar, müzakirələr və məlumatlandırıcı materiallar vasitəsilə iştirakçıların mövzuya marağı artırılıb, onların fəal iştirakı təmin edilib.

Tədbirin sonunda vurğulanıb ki, hər bir fərdin qida və resurslardan məsuliyyətli istifadə etməsi dayanıqlı gələcəyin formalaşmasında mühüm rol oynayır. Bu kimi təşəbbüslərin davamlı şəkildə həyata keçirilməsi universitetdə ekoloji şüurun artırılmasına və dayanıqlı inkişaf prinsiplərinin geniş təşviqinə xidmət edir.

Qeyd edək ki, Mingəçevir Dövlət Universitetində dayanıqlı inkişaf məqsədlərinə uyğun olaraq mütəmadi olaraq maarifləndirici tədbirlər, təlimlər və kampaniyalar təşkil edilir, tələbələr arasında ekoloji məsuliyyətin və sosial həssaslığın gücləndirilməsi istiqamətində ardıcıl fəaliyyət həyata keçirilir.