Azərbaycan təmkin, konstruktivlik və sağlam düşüncə nümayiş etdirir

Azərbaycan təmkin, konstruktivlik və sağlam düşüncə nümayiş etdirir

30 ilə yaxındır ki, Azərbaycan xalqı erməni şovinistlərinin silahlı hücumlarına məruz qalıb. Torpaqlarımızın 20 faizini işğal altında saxlayır. Bu həqiqətləri dünya birliyi bilir. İllərdir danışıqlar aparılsa da düşmən işğal etdiyi torpaqlardan qeyd şərtsiz çıxmaq istəmir. Ermənistan bu dəfə açıq müharibəyə başlayıb. Ermənilərin sentyabrın 27-də səhər başladıqları hərbi təxribat nəticəsində Azərbaycanın yaşayış məntəqələri və döyüş mövqeləri şiddətli artilleriya atəşinə məruz qalıb. Bu təcavüz nəticəsində Azərbaycanın 11 dinc sakini, o cümlədən 2 uşaq həlak olub, hərbi qulluqçular arasında da həlak olanlar var. Azərbaycan təcavüzkara adekvat cavab verməyə və beləliklə, öz xalqımızı, öz adamlarımızı və torpağımızı müdafiə etməyə məcbur idi. Döyüşlər nəticəsində Azərbaycan Ordusu bir sıra yaşayış məntəqələrini işğaldan azad edib, həmçinin müxtəlif istiqamətlərdə strateji yüksəklikləri tutub. Fəal döyüş əməliyyatları aparılır. Hadisələr hazırda bütün dünyanın diqqət mərkəzindədir. Bununla bağlı Azərbaycan Respublikasının Prezidenti İlham Əliyev Rusiyanın “Rossiya-1” telekanalının “60 dəqiqə” proqramına canlı müsahibəsində bütün həqiqətləri aydın şəkildə bəyan edib. Düşmənin illər boyu Azərbaycan torpaqlarının sərhəd bölgələrini atəşə tutması, mülki əhalini öldürməsi, yaşayış yerlərinə, inzibati binalara vurulan zərbələr insanların firavan yaşamasına böyük zərbə vurur.

Müsəlman dövləti olaraq Azərbaycana qarşı yönələn təxribata, düşmənə və onun havadarlarına əməllərini yaxşı bilən dünyanın bir çox dövlətləri və xüsusilə islam aləmi Azərbaycanın tərəfindədir, yəni haqqın-ədalətin tərəfindəndir. Və fərəhlə demək yerinə düşər ki, Türkiyə regionda sülhün təminatçısıdır. Türkiyənin rolu regionda sabitləşdirici xarakter daşıyır. Türkiyə qardaş ölkə və müttəfiqdir. Ermənistanın Azərbaycana hücum etməsini dünya ictimaiyyətinin bildiyi ilk saatdan etibarən Türkiyə dövlət başçısı və digər rəhbərlər səviyyəsində birmənalı olaraq Azərbaycanı dəstəklədiyini, beynəlxalq hüququ dəstəklədiyini bildirib. Ona görə ki, Ermənistan 30 ilə yaxın müddətdə Azərbaycan ərazisini işğalda saxlamaqla beynəlxalq hüququ kobud şəkildə pozur. Türkiyə mənəvi dəstək göstərir və Türkiyə rəhbərliyinə, Türkiyə Prezidentinə və türk xalqına Azərbaycan ilə həmrəy olduğuna və dəstəklədiklərinə görə təşəkkür edirik. Guya Türkiyənin münaqişə tərəfi kimi iştirak etməsi barədə erməni tərəfin yaydığı bütün şayiələr təxribat xarakteri daşıyır, indiki dildə desək bu, feyk-nyusdur. Türkiyənin münaqişədə iştirakı barədə heç bir sübut yoxdur və buna zərurət yoxdur. Azərbaycan Ordusu öz xalqının və öz ərazisinin müdafiəsini təmin etmək üçün kifayət qədər hazırlıqlıdır.

           Azərbaycanın Ermənistanın torpaqlarında hərbi maraqları yoxdur. Azərbaycan erməni torpağına daxil olmayıb, heç bunu fikrindən belə keçirmir. İnformasiya məkanında Ermənistanın SU-25 döyüş təyyarəsinin Türkiyənin F-16 qırıcı təyyarəsi tərəfindən vurulması haqqında xəbər yayılıb. O, heç nə ilə təsdiq edilməyib. Göründüyü kimi, irticaçı dövlət böhtan atmaqda da mahirdir. Yalan informasiyalar yaymaqla diqqəti öz üzərlərinə çəkmək, məzlum görkəmi almaq istəyirlər. Real həqiqətdir ki, Türkiyə Hərbi Hava Qüvvələrinin F-16 təyyarələri döyüş əməliyyatlarında heç bir şəkildə iştirak etmir. Bu gün müasir texnologiyaları nəzərə alsaq nəyisə gizlətmək çox çətindir. Çünki obyektiv müşahidə formaları var, peyk müşahidələri var və ona görə də bunun növbəti təxribat olmasını yoxlamaq çox asandır. Erməni tərəfin bu cür yalan xəbərlər yaratmaqda məqsədi aydındır. Əvvəla, öz ərazi bütövlüyünün bərpası vəzifəsini hazırda şərəflə yerinə yetirən Azərbaycan Ordusunun döyüş qabiliyyətini süni şəkildə azaltmaq, həmçinin belə təsəvvür yaratmaq ki, münaqişə genişlənir, ona üçüncü ölkələr qoşulur və beləliklə, öz təxribatına haqq qazandırmaq üçün mümkün qədər çox ölkə cəlb etməyə çalışmaq. Azərbaycan bütün məsuliyyəti ilə bəyan edir ki, Türkiyə münaqişə tərəfi deyil, münaqişədə heç bir şəkildə iştirak etmir və buna zərurət yoxdur.

Uzun illərdir ki, iki ölkə həmsədr dövlətlərin iştirakı ilə danışıqlar aparır, sülh yolu ilə torpaqların geri qaytarılması müzakirə edilir. Lakin düşmən dövlət bütün qərarlara, qətnamələrə əhəmiyyət vermir, istədiyini edir.

Azərbaycan müzakirələrdə hər zaman konstruktiv olub. Azərbaycan danışıqlarda həmişə konstruktivlik nümayiş etdirib. Vasitəçilik missiyası üçün cavabdeh olan Minsk qrupunun həmsədrləri də bunu təsdiq edə bilərlər. O cümlədən son iki ildə dəfələrlə bəyan edilib ki, illər boyu işlənib hazırlanmış, Minsk qrupunun və onun həmsədrlərinin danışıqlar prosesi üçün əsas hesab etdikləri nizamlama prinsiplərinə sadiqik. Üstəlik son iki ildə və bundan əvvəl də dəfələrlə bəyan edilib ki, danışıqların formatına da sadiqik.

Münaqişənin yalnız iki tərəfi var – Ermənistan və Azərbaycan. Lakin son illər ərzində, Ermənistandakı indiki hakimiyyətin törətdiyi Soros çevrilişindən sonra nələr baş verib? Ermənistanın baş naziri açıq-aşkar bəyan edir ki, “Qarabağ Ermənistandır və nöqtə”. Belə olan halda hansı danışıqlar prosesindən söhbət gedə bilər. ATƏT-in Minsk qrupu tərəfindən işlənib hazırlanmış prinsiplərin mahiyyəti ondan ibarətdir ki, keçmiş Dağlıq Qarabağ Muxtar Vilayəti ətrafındakı ərazilər Azərbaycana verilməlidir. Özgə torpağını elan edilməmiş müharibə yolu ilə, yüzlərlə insanın qanı bahasına ələ keçirən düşmən ölkənin rəsmiləri məkrli niyyətlərini həyata keçirməkdən çəkinmirlər. Lakin Ermənistanın baş naziri deyir ki, “Qarabağ Ermənistandır” və üstəlik, deyir ki, danışıqlar Dağlıq Qarabağın oyuncaq rejimi ilə aparılsın. Beləliklə, danışıqların artıq 20 ildən bəri mövcud olan formatını dəyişməyə çalışır. Deməli, Ermənistan bilərəkdən danışıqlar prosesini pozur, qəbuledilməz tələblər irəli sürür və əgər Minsk qrupu son vaxtlar nizamlamaya kimin əngəl olması barədə daha fəal danışmağa başlayırsa, sentyabrın 27-də, bundan əvvəl isə iyulun 12-də olduğu kimi, təxribatlar törədirlər. Dövlət sərhədindəki bizim mövqelərimizə hücum edilib. ATƏT-in Minsk qrupunun həmsədrləri isə Rusiya, Fransa və ABŞ-ın dövlət başçılarının şəxsində dəfələrlə bəyanatlar veriblər ki, status-kvo qəbuledilməzdir. Bu isə o deməkdir ki, işğal altında olan ərazilər Azərbaycana qaytarılmalıdır. Azərbaycan danışıqlara sadiqdir, lakin Ermənistan tamamilə əks hərəkətlər görür;

Ermənistan artıq bir neçə ay idi ki, hücuma – yeni müharibəyə hazırlaşırdı. İyulun 12-də düşmənin Tovuz rayonunun kəndlərinə hücumu zamanı törətdiyi faciə nəticəsində Azərbaycan qurbanlar verdi. Düşmən əməlindən çəkinmir, daha da irəli getməyə cəhd göstərir. Onların hərəkətlərinin və bəyanatlarının xronologiyası aşkar göstərir ki, onlar bu təxribata şüurlu şəkildə gedirdilər. Prezident İlham Əliyev BMT Baş Assambleyasının tribunasından çıxış edərkən demişdi ki, Ermənistan müharibəyə hazırlaşır və onu dayandırmaq lazımdır. İyul ayında onlar dövlət sərhədindəki yaşayış məntəqələrə silahlı hücum etdilər. Bu, münaqişə zonasından uzaq bir yerdir. O vaxt bir dinc sakin və bir neçə hərbi qulluqçu həlak oldu. Döyüşlər dörd gün davam etdi. Ermənistan ərazisində heç bir hərbi hədəfimiz olmayıb və yoxdur. Buna görə də Ermənistan silahlı qüvvələri torpaqlarımızdan çıxarılandan dərhal sonra qarşılıqlı razılaşmaya əsasən atəş dayandırıldı.

Ermənistan öz çirkin əməllərini dayandırmır, açıq-aşkar, nümayişkaranə şəkildə əslən Livandan olan ermənilərin Azərbaycanın işğal edilmiş ərazilərində və qədim Şuşa şəhərində məskunlaşdırılmasını elan edir, bu da müharibə cinayətidir. Bu, Cenevrə Konvensiyasının pozulması deməkdir. Sonra onlar Şuşada – Azərbaycan mədəniyyətinin qədim incisində cinayətkar Dağlıq Qarabağ rejiminin qondarma başçısının qondarma inauqurasiyasını keçirirlər. Bütün bunlar şüurlu provokasiyalar, Azərbaycanı münaqişəyə cəlb etmək və cavab hərəkətlərinə təhrik etməkdir. Azərbaycan təmkin, konstruktivlik və sağlam düşüncə nümayiş etdirdi, lakin onların niyyətləri baş tutmayanda bu cür cəhd göstərdilər. Ermənistanın rəhbərliyi öz xalqını belə pis niyyəti uğrunda qurban verməyə hazırdır. Döyüş bölgəsində olan ermənilər əslində hərbçilər deyil, sadə insanlardır və bura zorla gətiriliblər. Onlar nə döyüş istəyir, nə də özgə torpağı, rəhbərlik isə   oz oyunlarından qalmır.

Bu gün Paşinyanın şəxsində Ermənistanın rəhbəri Sorosun əlaltısıdır. Daha bir səbəb Ermənistanda mövcud olan daxili siyasi böhrandır. Bu gün Ermənistanda Soros rejimi mövcuddur. Paşinyan çoxlu vədlər verib və bu vədləri yerinə yetirə bilmir, əslində, ölkə böhran içindədir.Beləliklə, ona bir xarici amil, necə deyərlər, qarışıqlıq lazım idi ki, əhalinin diqqətini yayındırsın, o da bunu edə bildi. Onlar növbəti dəfə hücum etməzdən iki gün əvvəl Ermənistanın əsas müxalifət partiyasının lideri həbs edildi. Yəni, Paşinyanın diktator, despotik rejimi öz ölkəsindəki bütün müxalifəti məhv edirdi və indi Azərbaycan xalqına qarşı yenidən təcavüz nümayiş etdirir.

Fərəhlə demək olar ki, müstəqillik əldə etdikdən sonra Azərbaycanda ölkəmizin prezidenti İlham Əliyevin rəhbərliyi ilə güclü Azərbaycan Ordusu yaradılıb, formalaşıb. Milli Ordumuz düşmənin bütün hücumlarını dəf etməyə , torpaqlarımızı müharibə yolu ilə geri qaytarmağa qadirdir. Senrtyanrın 27-dən bəri   hərbçilərimizin nümayiş etdirdikləri əks hücum, düşmənə vurduğu ağır zərbələr, ərazilərimizin bir hissəsinin azad edilməsi buna əyani sübutdur.

Azərbaycan ordusunun muzdlu döyüşçülərə ehtiyacı yoxdur. Bu, növbəti feyk-nyusdur. Suriyadan heç bir muzdlu yoxdur. Bu barədə heç bir fakt, heç bir sübut yoxdur. Bunu erməni təbliğatı ortaya atıb və müxtəlif saytlarda, müxtəlif kütləvi informasiya vasitələrində dövr edir. Buna heç bir ehtiyac yoxdur. Azərbaycanın hazırlıqlı ordusu var, çox böyük səfərbərlik ehtiyatı var. Dünən qismən səfərbərlik elan edilib. 2 milyon əhalisi olan Ermənistana qarşı Azərbaycan 10 milyon əhalisindən 10 minlərlə ehtiyatda olanları orduya çağırır, insan ehtiyatlarına ehtiyacımız yoxdur. Azərbaycan özünü müdafiə etməyə və təcavüzkarı elə cəzalandırmağa qadirdir ki, o, bir daha Azərbaycan tərəfə baxmağa cəsarət etməsin.

Xalqımız ilk qələbə müjdəsini alıb. Prezidentimiz, Ali Baş Komandan İlham Əliyevin rəhbərliyi ilə bundan sonra daha böyük qələbələr əldə etmək ümidi ilə xalqımıza, döyüşçülərimizə gözaydınlığı verir, güclü döyüş əzmi arzulayıram.

 

Fərman Nəbiyev,

Əməkdar Jurnalist