Mingəçevir Dövlət Universiteti əmək bazarında bərabər imkanların təşviqi, inklüziv karyera mühitinin formalaşdırılması və gənclərin bu sahədə innovativ həllər yaratmaq bacarıqlarının inkişaf etdirilməsi məqsədilə “Bərabər Məşğulluq və Karyera İmkanları” adlı startap marafonuna ev sahibliyi edib. Tədbir Təcrübə və Karyera şöbəsi ilə İT şöbəsinin birgə təşkilatçılığı ilə həyata keçirilib.
Marafon çərçivəsində iştirakçılar əmək bazarında mövcud olan qeyri-bərabərlikləri — işə qəbul proseslərində fərqli yanaşmalar, imkanlara çıxış fərqləri, sosial və iqtisadi maneələr kimi problemləri təhlil edərək bu çağırışların həllinə yönəlmiş innovativ layihələr hazırlayıblar. Komandalar inklüziv işə qəbul platformaları, bacarıq əsaslı qiymətləndirmə sistemləri, karyera inkişafını dəstəkləyən rəqəmsal alətlər və müxtəlif sosial qruplar üçün bərabər imkanlar yaradan texnoloji həllər təqdim ediblər.
Startap marafonunun əsas məqsədi iştirakçıları sosial problemlərə texnologiya və innovasiya prizmasından yanaşmağa təşviq etmək və real təsir yarada biləcək layihələrin hazırlanmasını dəstəkləmək olub. İştirakçılar sosial ədalət prinsipləri, iqtisadi səmərəlilik və praktik tətbiq imkanlarını nəzərə alan kompleks həllər hazırlayıblar.
Tədbir zamanı iştirakçılar komandalar şəklində intensiv fəaliyyət göstərərək ideyalarını qısa müddətdə funksional startap konsepsiyalarına çeviriblər. Bu proses onların analitik düşüncə, yaradıcı yanaşma və sosial problemlərin həllinə innovativ baxış bacarıqlarının inkişafına mühüm töhfə verib.
Yekun mərhələdə komandalar layihələrini münsiflər heyətinə təqdim ediblər. Layihələr innovativlik, inklüzivliyə töhfə, əmək bazarının tələblərinə uyğunluq və tətbiq potensialı meyarları əsasında qiymətləndirilib. Ən uğurlu layihələr xüsusi qeyd olunub və iştirakçılara gələcək inkişaf istiqamətləri ilə bağlı praktiki tövsiyələr verilib.
“Bərabər Məşğulluq və Karyera İmkanları” startap marafonu tələbələrin sosial məsuliyyətinin artırılması, əmək bazarında bərabər imkanları təşviq edən innovativ həllərin yaradılmasının təşviqi və universitetdə inklüziv innovasiya mühitinin inkişafına töhfə verən mühüm təşəbbüs kimi qiymətləndirilib.